سەرەتا / به‌شێن مالپه‌ری / بابەت / رۆلێ نوخبه‌يا دەستەهڵاتدار دخرابکرنا دەرۆن وڕەوشتێ جەماوەری دا .

رۆلێ نوخبه‌يا دەستەهڵاتدار دخرابکرنا دەرۆن وڕەوشتێ جەماوەری دا .

رۆلێ نوخبه‌يا دەستەهڵاتدار دخرابکرنا دەرۆن وڕەوشتێ جەماوەری دا .

 

جاسم محمد شەرنەخی

ددرێژاهیا ئەزموونا هەرێمێدا زۆر جاران دۆپاتبۆيه‌: هاوڵاتیێن ئاخا  مە بەرەڤ پێشڤە نەچووینە، چ ژلایێ گەشەپێدانا شیانێت مرۆڤی وژلایێ ساڵۆخەتێن دەرۆنی ڤە يانژى هه‌تا یێت ڕەوشتی ڤەژى، ددەمێن هەستیاردا ودوەختێن زێریندا گەله‌ک وێنە ودیمەن هاتن ڤەگوهاستن تەکەستی لسەر وێ چەندێ هاتە کرن کو هێڵەکا بەرفەهـ ژخەلکێ کوردستانێ بەرەڤ پێشڤە ناچیت بەلکی پاشگەزیيێ دکتن وپێنگاڤ بۆ گەهشتنا کەسایەتیا ئازاد وهاوڵاتیێ چاک نا هێنە هاڤێتن، بەلکی عەبدینیا مرۆڤ وحزب وبنەماڵ وهەتا تاکەکەسا هەر یا بەردەوام وبەر قەرارە، کویلە وبەند شانازیێ ب بەندایەتیا خو دبن، ودەستەهەڵاتداران  وەکی صەنەم وئیلاها دسەر پڕسیارکرن وحەسیبکرنێ دا وان ددەینن، ونیشان وساڵۆخەتێن کڕێت وئەز دشێم بێژم هەتا یێت چەپەڵ وەکی دووڕۆیاتی ومەللاقی یێت پێشچاڤن، وژوان تشتێن دلێ مرۆڤی پێ ڕاببت ئەوە چەندین جاران ب ئاماژەکا بەرپرسەکێ بێ بهاڤە چەپەڵترین کار مینا بێ ڕێزکرنا سەیدا ومەڵا ومامۆستایێن زانکویێ ل نیڤا جادەیێت کوردستانێ هاتنە ئەنجامدان وهەتا هندەک جاران ئەڤ بێ ڕەوشتیە دناڤ حەرەمێت دەزگەهێن فێرکرنێ دا ژی ڕوی دایە، وەکی بسەرێ نڤێسەرێ ڤێ گۆتارێ بخوەژی هاتی، وئەڤە ژبلی بەڵاڤبوونا دزیکرنا سامانێ وەڵاتی کۆ بنازکیڤە دبێژنێ کەندەڵی وەکی ئێشا پەنجەشێرێ دناڤ هەمی دام ودەزگەهێت میری دا جهێ خوە موکوم کریە، وئەز دبینم یا فەرە ڕێزەکێ ژپەڕتۆکا بەرتیلێ دۆبارە بخوینم کو ئەگەر ئەم ڕێژەیا وێ خرابيێ ل ڤێ گاڤێ بەراوردەکین دگەل ده‌ستپێكا ساڵا نووتێ دێ بێ مننەت بێژين: هزار جاران هندی خوە لێ هاتیە وئەڤ ڕاستیە حاشانەهلگرە ژبلی لایێ کەسەکی درەوین نە بتن.

ئەڤ دەردەسەریێت مە گۆتین ویێت وەکی وان ئەوێت مە نە گۆتین گەلەک جاران بەرپرسیا وی یا هاتیە پاڵدان بۆ خەلکێ سادە وبۆ جەماوەری، وئەڤێ چەندێ ڕاستیا بۆ هەی کو گەل ژبەرپرسیێ نە بێ باره‌، بەلێ ڕاستیەکا مەزنتر یا هەی ئەوە کو نوخبەیا حوکمدار یانژی ڕێژەیکا مەزن ژوێ نۆخبێ چەندین جاران  بەرپرسیا وێ مەزنترە وتاوانا وێ زێدەترە ژیا جەماوەری، پرسیار ئەڤەیە بۆچی؟

بەرپرسیا تاقما سیاسیا دەستهەڵاتدار دڤێ چەندێ دا یە:

۱ـ ئەوێ ئەمانەتا سەرکێشیا گەلێ خوە کریە ودڤیا شوفێریەکا باش کربا ونموونەیەکا ڕەوشتبەرزیێ با بۆ ڕێزگرتنا ل بهایێت بلند وبۆ سەروەریا یاسایێ، لێ مخابن بەڕۆڤاژی ڤێ چەندێ بۆیە.

۲ـ دڤیا نوخبەیا حوکمدار چارەسەرکەربا ژبۆ ئێشێن چڤاکی بحوکمێ وێ چەندێ ئەو چاڤ وعەقلێ مللەتیە نەک ئێشێن چڤاکیێن کەڤن ئیستیغلال کربا ژبۆ فیرعەونکرنا خوە، ئەو ئێشێن ب دەهان ساڵان بەردەوام بووین  ژئەگەرێ چەوساندنا داگیرکەڕێن دکتاتۆر کو هەوڵ دابوون هەمی جاران عەبدینیێ وکوڵەتیێ وسەرشۆریێ و(بەلێ بۆ فیرعەونى) بچەسپینن.

۳ـ وبەڵگەیەکا دیتر ل سەر بەرپڕسیا تاقما سیاسی ئەوە کو وەکی دیار هەمی کەسێن ئەو کریارێت خراب ئەنجامدان، قوتابیێن قوتابخانا ڤێ تاقمێ بین.

بکورت وکرمانج ئەم هەمی بەرپرسن ژڤێ پاشگەزیا سیاسی ودەرۆنی وڕوەشتی لێ نوخبە بەرپڕسترە، بەلێ بەڕپرسیا مللەتی ژبۆ ڕاستڤەکرنێ وسزادانێ وچاڕەسەرکرنێ ئەرکەکێ پیرۆزە ودهەمان دەم دا وەک نڤێژێ فەرزە، وتەنها ئەوە دەرمان وئەوە چارەسەری.

مالپه‌رێ خابير / زاخۆ

Check Also

چەند گوتنەكێن زانایان بەرانبەر پێغەمبەری (سلاڤ لێ‌ بن)

چەند گوتنەكێن زانایان بەرانبەر پێغەمبەری (سلاڤ لێ‌ بن). مالپەرێ‌ خابیر / زاخۆ ئا: ردوان گوللی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *