ليستا 119
سەرەتا / به‌شێن مالپه‌ری / ئاینى / ریمه‌تى و ڤیانا ناڤ و ده‌نگان.

ریمه‌تى و ڤیانا ناڤ و ده‌نگان.

ریمه‌تى و ڤیانا ناڤ و ده‌نگان.
مالپه‌رێ خابیر / زاخۆ

ریـمـه‌تى و حه‌ژێكرنا ناڤ وده‌نگ و جاه و مه‌نصبان ئه‌و ژى ئێك ژ وان ده‌رگه‌هێن به‌رفره‌هه‌ یێن شه‌یتان تێڕا قه‌ستا دلـێ مرۆڤى دكت دا ده‌سته‌سه‌ر بكت و بێخته‌ داڤێن خۆه‌.. ئه‌ڤ ده‌رگه‌هه‌ ئه‌وه‌ یێ گه‌له‌ك جاران ئه‌و تێڕا قه‌ستا دلێن مرۆڤێن زانا و عیباده‌تكه‌ر ژى دكت، و وان پێ دئێخته‌ ڕه‌شه‌ داڤێن خۆه‌، له‌و ئه‌ڤ ده‌رگه‌هه‌ زێده‌ یێ خوه‌گره‌، و خۆه‌ لـێ هشیاركرن زێده‌ یا فه‌ره‌.
ریـمه‌تى وحه‌ژێكرنا (جاه وشوهره‌ت) وناڤ وده‌نگان، وكو مرۆڤى بڤێت خـۆه‌ بـیـنـتـه‌ پـێـش دا خه‌لك ب سه‌رێ تبلان ئیشاره‌تێ بدته‌ مرۆڤى ئێك ژ ئه‌گه‌رێن تـێـبـرنا خودانینه‌، له‌و عه‌ره‌بان د كه‌ڤن دا گۆتییه‌:
(حب الظهور قاصمة الظهور ـ ڤیانا خۆه‌ ئینانه‌ پێشێ پشتان دشكێنت)،
وئه‌ڤ ده‌رده‌یـه‌ یێ زانا دبێژنێ: (شركا بچویكـتـر) یان (شركا به‌رزه‌)، چـونـكـى ئـه‌و كانێ چه‌ند د ناڤ ئومـمـه‌تێ دا یا به‌لاڤه‌ هند ئه‌و یا ڤه‌شارتییه‌ ژى! وگه‌له‌ك جاران ـ وه‌كى مه‌ گۆتى ـ مرۆڤێـن زانا وعیباده‌تكه‌ر تویشى ڤى ده‌ردى دبن وپێ دكه‌ڤن، چونكى ئه‌و ل سه‌رى ب سستى ڤه‌ وه‌ردگرن، و ب تشته‌كێ سورشتى دزانن له‌و چو هزرێ بۆ ناكه‌ن.. ده‌مێ ئه‌و دبینن خه‌لك یێ ل دۆر كۆم دبن ومه‌دحێن وان دكه‌ن، ومـوبــالـه‌غـێ د قه‌درگرتنا وان دا دكه‌ن، ئه‌و هزر دكه‌ن ئه‌ڤه‌ قه‌در گرتنه‌كه‌ ژ وان بۆ علمى، له‌و چو هزرێ ژێ ناكه‌ت، حه‌تا هند ب خۆ دحه‌سیێن كو ئه‌و ژ خه‌لكى بلندترن له‌و دڤـێـت د بلندتر بن، وئه‌ڤه‌ پێگاڤا ئێكێ یه‌ وان به‌ر ب ده‌ردێ ریمه‌تى وحه‌ژێكرنا جاه وشوهره‌تێ ڤه‌ دبه‌ت، ژ به‌ر ڤێ ئێكێ ئیسلامێ ڕێ نه‌دایه‌ مه‌ ئێك ژ مه‌ مه‌دحێن كه‌سه‌كى د ڕوییێ وی دا بكه‌ت.

ڕاستییا ریمه‌تییێ وحه‌ژێكرنا جاه وشوهره‌تێ:
ریمه‌تى ئه‌وا ب عه‌ره‌بى دبێژنێ: (الریا‌ء) ئه‌وه‌ كه‌سه‌ك ب گاعه‌تێ خودێ رازیبوونا به‌نییان بخوازت، یه‌عنى: باشییێ بكه‌ت وبێژت بۆ هندێ دا خه‌لك پێ بحه‌سیێن ومه‌دحێن وى بكه‌ن وژێ رازى ببن، مه‌عنا: ئارمانجا وى ب ڤى كارێ باش ئه‌وه‌ دلـێ خه‌لكى ب نك خۆ ڤه‌ بكێشت ووان ژ خۆ رازى بكه‌ت دا وان كه‌یف پێ بێت.
وئه‌گه‌ر مرۆڤ ب دورستى هزرا خۆ د ڤى كارى دا بكه‌ت دێ زانت كو ئه‌و ڕه‌نگه‌كێ شركا ب خودێ یه‌، چونكى ئه‌و كه‌سێ ڤێ چه‌ندێ بكه‌ت ئنیه‌تا وى صافى بۆ خودێ نابت، مه‌عنا: ئه‌و هنگى هنده‌ك كه‌سان دئینته‌ ڕێزا خودێ ودخوازت وان ژى د گه‌ل خودێ ژ خۆ رازى بكه‌ت.
وحه‌ژێكرنا جاه وشوهره‌تێ ئه‌وه‌ ئارمانجا مرۆڤى ژ هه‌ر كاره‌كى ئه‌و بت مرۆڤ دلێن خه‌لكى ب نك خۆ ڤه‌ بكێشت، وئێكا هند بكه‌ت ئه‌و حه‌ز ژ وى بكه‌ن دا بشێت ب ڤـێ چـه‌نـدێ بگه‌هته‌ وان شه‌هوه‌ت وحه‌زكرنێن وى دڤێت ب ده‌ست خۆ بێخت، وه‌كى وى ده‌وله‌مه‌ندێ حه‌ز دكه‌ت مالـێ خۆ پتـر لـێ بكه‌ت دا بشێت پتـر خۆشى وشه‌هوه‌تان ب ده‌ست خۆ بێخت.
وئه‌گه‌ر مرۆڤى ئه‌ڤ ئارمانجه‌ دانا به‌ر سنگێ خۆ ل به‌ر وى دێ تشته‌كێ گه‌له‌كێ ب ساناهى بت ئه‌و پێ ل حه‌قییێ بدانت وڕاستییێ ڤه‌شێرت ئه‌گه‌ر هات خه‌لكى ب ڤێ چه‌ندێ خۆش بت، یان ژى بلا بێژین: دێ بته‌ مرۆڤه‌كێ وه‌سا حه‌قییێ ل دویڤ دلێ خه‌لكى ببه‌ت، وكارى بۆ هندێ نه‌كه‌ت خه‌لكى ل دویڤ حه‌قییێ ببه‌ت دا كه‌س ژێ عێجز نه‌بت.

ریمه‌تى د كیتاب وسوننه‌تێ دا:
ئه‌گه‌ر ئه‌م به‌رێ خۆ بده‌ینه‌ كیتابێ وسوننه‌تێ دێ بینین ل گه‌له‌ك جهان خودێ وپێغه‌مبه‌رى ـ سلاڤ لـێ بن ـ ئه‌م ژ ریمه‌تییێ یێن داینه‌ پاش، ووان ئه‌و ل به‌ر مه‌ یا ڕه‌ش كرى، وئه‌م ل هندێ ئاگه‌هدار كرینه‌ كو ریمه‌تى كارێ باش پویچ دكه‌ت وچو خێرێ تێ ناهێلت، و ب ڕاستى هه‌ر ئایه‌ته‌ك یان حه‌دیسه‌كا به‌رێ مه‌ دایه‌ ئیخلاصا د كارى دا ئه‌و داخوازه‌كه‌ بۆ خۆ دویر ئێخستنا ژ ریمه‌تییێ، چونكى ڕوییێ به‌رانبه‌ر بۆ ریمه‌تییێ ئیخلاصه‌، ل جهه‌كى خودایێ مه‌زن ئاشكه‌را دكـه‌ن كـو فـه‌رمـان ل هه‌مى پێغه‌مبه‌ر ودویكه‌فتییێن وان ب ئیخلاصا د كرنا عیباده‌تى دا هاتـیـیـه‌ كرن وه‌كى دبـێـژت: { وَمَا أُمِرُوا إِلاَّ لِيَعْبُدُوا اللهَ مُخْلِصِينَ لَهُ الدِّينَ حُنَفَاءَ وَيُقِيمُوا الصَّلاَةَ وَيُؤْتُوا الزَّكَاةَ وَذَلِكَ دِينُ الْقَيِّمَةِ } [ سُورَةُ البَيِّنَةِ : 5 ] وئیخلاصا د كرنا عیباده‌تى دا ئه‌وه‌ مرۆڤ خۆ ژ رویمه‌تییێ بده‌ته‌ پاش.
و ل جهه‌كێ دى خودایێ مه‌زن تێبرن وهیلاكێ ل سه‌ر وان عیباده‌تكه‌ران دنڤیست یێن ریمه‌تییێ دكه‌ن، ودبێژت: { فَوَيْلٌ لِلْمُصَلِّينَ , الَّذِينَ هُمْ عَنْ صَلاَتِهِمْ سَاهُونَ , الَّذِينَ هُمْ يُرَاءُونَ , وَيَمْنَعُونَ الْمَاعُونَ }
عه‌زابا دژوار بۆ وان نڤێژكه‌ران بت یێن خۆ ژ نڤـێـژا خۆ موژیل دكه‌ن وژێ بێ ئاگه‌ه دمینن، ئه‌وێن بۆ ریمه‌تییا مرۆڤان كریارێن خۆ ئاشكه‌را دكه‌ن. وهاریكارییێ ژ خه‌لكى مه‌نعه‌ دكه‌ن ] (الماعون 4-7).
و د ئایه‌ته‌كێ دا خودایێ مه‌زن دهاڤێته‌ وان منافقان یێن خه‌لكى ژ خۆ رازى دكه‌ن ل سه‌ر حسێبا رازیبوونا خودێ ودبێژت: { وَلِلَّهِ مَا فِي السَّمَاوَاتِ وَمَا فِي الأَرْضِ وَكَفَى بِاللهِ وَكِيلاً } [ سُورَةُ النِّسَاءِ : 132 ] مه‌خسه‌دا وان رویمه‌تییه‌ ودا خه‌لك مه‌دحێن وان بكه‌ن، وكێمه‌كێ نه‌بت ئه‌و خودێ ل بیـرا خـۆ نائینن ] (
وپێغه‌مبه‌ر ـ سلاڤ لـێ بن ـ د گۆتنه‌كا خۆ دا دبێژت: [ مَنْ سَمَّعَ سَمَّعَ اللّهُ بِهِ ۆمَنْ یُرَائِی یُرَائِی اللّهُ بِهِ ] ( ) ومه‌عنا ڤێ حه‌دیسێ ئه‌وه‌ هه‌ر كه‌سه‌كێ كاره‌كێ باش بكه‌ت ومه‌خسه‌دا وى پێ خودێ نه‌بت، به‌لكى ئارمانجا وى ئه‌و بت خه‌لك وى ببینت وبه‌حسێ وى بكه‌ن، خودێ شه‌رما وى دێ د ناڤ خه‌لكى دا به‌ت، وئه‌و تشتێ خراب یێ د دلـێ وى دا دێ هه‌ى خودێ بۆ خه‌لكى دێ ئاشكه‌را كه‌ت.
و د حه‌دیسه‌كا دى دا پێغه‌مبه‌ر ـ سلاڤ لـێ بت ـ دبێژت: [ إن أخوفَ ما أخافُ علیكم الشركُ الأصغرُ ـ تـشـتـێ ژ هـه‌میـیان پتـر ئه‌ز ژێ دترسم ل سه‌ر هه‌وه‌ شركا بچویكتـره‌ ] گـۆتن: شركا بچویكتـر چیه‌ ئه‌ى پێغه‌مبه‌رێ خودێ؟ گۆت: [ الریا‌ء، إن الله تباركَ وتعالى یقولُ یومَ تُجازَى العبادُ بأعمالهم: اذهبوا إلى الذینَ كنتم تــرا‌وونَ بأعمالكم فی الدنیا فانظروا، هـل تجدون عندهم جزا‌ءً؟ ـ
ریمه‌تییه‌، ڕۆژا قیامه‌تێ ده‌مێ جزایێ به‌نییان سه‌را كریارێن وان دئێته‌ دان خودێ دبێژت: هه‌ڕنه‌ نك وان یێن هه‌وه‌ د دنیایێ دا ب كریارێن خۆ ریمه‌تى بۆ دكر وبه‌رێ خۆ بده‌نێ كانێ دێ جزایه‌كى ل نك وان بینن؟ ]. ( )
ونێزیك ژ ڤێ حه‌دیسێ شه‌ددادێ كوڕێ ئه‌وسى دبێژت: پێغه‌مبه‌ر ـ سلاڤ لـێ بن ـ دبـێـژت: [ أتخوف على أمتی الشرك والشهوه‌ الخفیه‌ ـ
ئه‌ز ل سه‌ر ئوممه‌تا خۆ ژ شركێ وشه‌هوه‌تا ڤه‌شارتى دترسم ] ئینا من گۆتێ: ئه‌ى پێغه‌مبه‌رێ خودێ ما ئومـمـه‌تا ته‌ پشتى ته‌ دێ شركێ كه‌نه‌ڤه‌؟ وى گۆت: [ نعم، أمَا إنهم لا یعبدون شمساً ولا قمراً، ولا حجراً ولا وثناً، ولكن یرا‌وون بأعمالهم ـ به‌لـێ، ئه‌و عه‌بدینییا ڕۆژێ وهه‌یڤێ ناكه‌ن، وپه‌رستنا چو به‌ر وصه‌نه‌مان ژى ناكه‌ن، به‌لكى ئه‌و ریمه‌تییێ ب كریارێن خۆ دكه‌ن ]( ) ووه‌كى ئه‌م دبینین پێغه‌مبه‌رى ـ سلاڤ لـێ بن ـ د ڤان هه‌ردو حه‌دیسێن خۆ دا ریمه‌تى ژ شركێ هژمارت.
وكانێ چاوا خودێ وپێغه‌مبه‌رى ـ سلاڤ لـێ بن ـ ئه‌م ژ ریمه‌تییێ داینه‌ پاش وه‌سا وان ئه‌م ژ حه‌ژێكرن وداخوازا جاه وشوهره‌ت ومه‌نصبان داینه‌ پـاش ژ به‌ر وى ئـه‌نـجـامـێ خــراب یێ د دویڤ دا دئێت، خودایێ مه‌زن د ئایه‌ته‌كێ دا دبێژت: { تِلْكَ الدَّارُ الآخِرَةُ نَجْعَلُهَا لِلَّذِينَ لاَ يُرِيدُونَ عُلُوًّا فِي الأَرْضِ وَلاَ فَسَادًا وَالْعَاقِبَةُ لِلْمُتَّقِينَ } [ سُورَةُ القَصَصِ : 83 ] ـ ئـه‌و مالا ئاخره‌تێ یه‌ ئه‌م خۆشییا وێ دده‌ینه‌ وان یێن خۆمه‌زنكرنا د عه‌ردى دا وخرابكارى نه‌ڤێت، ودویماهییا بـاش بۆ وى یه‌ یێ خۆ ژ عه‌زابا خودێ دپارێزت وگوهدارییا وى دكه‌ت ]،
ووه‌كى ئه‌م دبینین ڤێ ئایه‌تێ ڤیانا خۆ بلندكرنا د عه‌ردى دا ب فه‌سادێ وخرابكارییێ ڤه‌ گرێ دا، وئاشكه‌را كر كو به‌حه‌شت ودویماهییا باش بۆ وى كه‌سییه‌ یێ ئه‌ڤ هه‌ردو تشته‌ ل نك نه‌هه‌ین.

ده‌ره‌جێن ریمه‌تییێ:
ریمه‌تییێ سێ ده‌ره‌جه‌ هه‌نه‌، یان ب سێ ڕه‌نگان دئێته‌ پێش چاڤ، ئه‌و ژى ئه‌ڤه‌نه‌:
ئێك: ئه‌و ریمه‌تییا په‌یوه‌ندى ب وى تشتى ڤه‌ هه‌ى یێ ریمه‌تى پێ دئێته‌كرن، كو گاعه‌ت وعیباده‌ته‌، وه‌كى ریمه‌تییا ب كرنا كارێن فه‌رز یان یێن سوننه‌ت.
دو: ئه‌و ریمه‌تییا په‌یوه‌ندى ب وان ڤه‌ هه‌ى یێن ریمه‌تى ژ به‌ر دئێته‌كرن كو مرۆڤن، وه‌كى وى یێ ریمه‌تییێ ل نك خه‌لكى دكه‌ت دا وان بخاپینت بۆ هندێ دا كو ئه‌و شه‌هوه‌ته‌كا دنیایێ ب ده‌ست خۆ ڤه‌ بینت، یان ژى بۆ هندێ دا خه‌لك ب چاڤه‌كێ كێم به‌رێ خۆ نه‌ده‌نێ.
سێ: ئه‌و ریـمه‌تییا په‌یوه‌ندى ب ریـمه‌تییێ ب خۆ ڤه‌ هه‌ى، وه‌كى وى یـێ د كارێ باش دا زیره‌ك دبت ده‌مێ خه‌لك وى دبینن، وئه‌گه‌ر كه‌سێ ئه‌و نه‌دیت ئه‌و سست دبت یان هه‌ر وێ باشییێ ناكه‌ت.

تشتێ ریمه‌تى ژێ گرت:
وگـه‌لـه‌ك تـشـت هـه‌نــه‌ ریـمـه‌تى دكه‌فتێ، ل ڤێرێ ئه‌م دێ ئیشاره‌تى ب هنده‌كان ده‌ین:
1ـ ریـمـه‌تییا د دینى دا ژ لایێ له‌شى وسه‌روبه‌رى دا: وه‌كى وى كه‌سى یێ ل نك خه‌لكى خۆ مه‌لویل وستۆخوار بكه‌ت وبكه‌ته‌ گرى دا خه‌لك بێژن: ئه‌ڤه‌ كه‌سه‌كێ ژ خودێ ترس و ب ته‌قوایه‌.
2ـ ریمه‌تییا ب كراسى وجلكى: وه‌كى وى كه‌سى یێ جلكێ زانایان دكه‌ته‌ به‌ر خۆ دا خه‌لك قه‌درێ وى بگرن وبێژن: ئه‌ڤه‌ مرۆڤه‌كێ زانایه‌، یان وه‌كى وى كه‌سى یێ جلكه‌كێ كه‌ڤن ودڕیاى دكه‌ته‌ به‌ر خۆ دا خه‌لك بێژن: ئه‌ڤه‌ صووفیه‌كێ زاهده‌.
3ـ ریمه‌تییا ب گۆتنێ: وه‌كى وى كه‌سى یێ ده‌مێ وه‌عزه‌كى ل خه‌لكى دكه‌ت وه‌سا د خۆ دئینته‌ ده‌ر كو ئه‌و یێ ژ به‌ر دئاخڤت دا خه‌لك بێژن: ئه‌ڤى علمه‌كێ زێده‌ هه‌یه‌، یان وه‌كى وى یێ ده‌مێ د ناڤ خه‌لكى دا دڕوینت لێڤێن خۆ بلڤلڤینت دا خه‌لك بێژن: ئه‌ڤه‌ گه‌له‌ك زكرى دكه‌ت.
4ـ ریـمـه‌تییا ب كار وكـریارێ: وه‌كى وى یێ نڤێژا خۆ درێژ دكه‌ت یان د نـڤـێـژێ دا خــۆ مـه‌لویـل دكه‌ت دا خه‌لك بێژن: چه‌ند مرۆڤه‌كێ ب ته‌قوایه‌، یان وه‌كى وى كه‌سى یێ ل پێش چاڤێن خه‌لكى خێران دده‌ت دا بێژن: چه‌ند مرۆڤه‌كێ مه‌رد وخێرخوازه‌.
5ـ ریمه‌تییا ب گه‌له‌كییا هه‌ڤال وهۆگر وكه‌س وكاران: وه‌كى وى یێ خه‌لكى گه‌له‌ك ل خۆ كۆم دكه‌ت و ب گه‌له‌كییا هه‌ڤالان دخوڕت، بۆ هندێ دا خه‌لك بێژن: ئه‌ڤه‌ هنده‌ هنده‌ مێڤان بۆ دئێن، و ل شه‌هى وبه‌هییێن وى هنده‌ زه‌لام كۆم دبن..
ئه‌ڤه‌ ئه‌و ڕێكن یێن ریمه‌تى پێ ل نك مرۆڤى په‌یدا دبت، له‌و شریعه‌ت مه‌ ژێ دده‌ته‌ پاش.

چاره‌یا ریمه‌تییێ:
چه‌ند ڕێكه‌ك هه‌نه‌ مرۆڤ دشێت ده‌ردێ ریمه‌تییێ پێ چاره‌سه‌ر بكه‌ت، ئه‌و ژى ئه‌ڤه‌نه‌:
1ـ مرۆڤێ د دل دا ب ریمه‌تییێ بحه‌سیێت دڤێت باش بزانت كو خودێ ڕۆژا قیامه‌تێ ده‌مێ حسێبێ د گه‌ل دكه‌ت ل دویڤ ئنیه‌تا دلى دێ حسێبێ دێ د گه‌ل كه‌ت نه‌ ل دویڤ وان گۆتنێن خه‌لك د ده‌ر حه‌قا وى دا دبێژت.
2ـ وحه‌تا ریمه‌تى جهێ خۆ د دلـێ وى دا نه‌كه‌ت دڤێت ئه‌و ب مه‌دح وقاپێن خه‌لكى د سه‌ر دا نه‌چت وڕاستییا خۆ ژ بیـر نه‌كه‌ت، چونكى ئه‌گه‌ر خه‌لك لایێ وى یێ ئاشكه‌را ب تنێ ببینن ئه‌و لایێ خۆ یێ ڤه‌شارتى ژى دبینت وپێ دزانت.
3ـ دڤێت ئه‌و بزانت كو مه‌دحێن خه‌لكى چو مفایى ناگه‌هیننه‌ وى ده‌مێ ئه‌و ب تنێ به‌رانبه‌ر خودایێ خۆ ڕادوه‌ستت.. ئه‌گه‌ر هات وئه‌و ب دورستى یێ وه‌سا نه‌بت وه‌كى خه‌لك ژێ دبێژن.
4ـ دڤێت ئه‌و چو بهایى نه‌ده‌ته‌ گۆتنێن وى خه‌لكى یێن مه‌دحێن وى دكـه‌ن یـان دهـاڤـێـنێ ئه‌گه‌ر ئه‌و ل نك خۆ یێ پشت ڕاست بت كو ئه‌و یێ ل سه‌ر حه‌قییێ وبلا ئه‌و ب گه‌له‌كى هه‌ڤال وپشته‌ڤانان ژى نه‌ئێته‌ خاپاندن.
5 ـ هـنـدى ژێ بێت بلا ئه‌و كارێ خۆ یێ باش ب ڕه‌نگه‌كێ ڤه‌شارتى بكه‌ت، وبلا ئه‌و ژ وان كه‌سان نه‌بت یـێـن مه‌دحان بـۆ خـۆ ب باشییێن خۆ دكه‌ن، وخرابییێن خۆ ژ بـیـر دكه‌ن.

چاره‌یا حه‌ژێكرنا جاه ومه‌نصبان:
وئه‌و كه‌سێ ده‌ردێ حه‌ژێكرنا خۆئینانه‌ پێش وحه‌صلكرنا جاه وگه‌هشتنا مه‌نصبان ل نك هه‌ى ب چار ڕێكان ئه‌و دشێت ده‌ردێ خۆ چاره‌سه‌ر بكه‌ت:
1ـ دڤێت ئه‌و باش بزانت كو ل ئاخره‌تێ ئه‌و ب تنێ ڤالا ژ هه‌مى جاه ومه‌نصب وشوهره‌تان دێ ئێته‌ نك خودایێ خۆ بۆ حسێبێ، ومرۆڤ هنگى چو مفایێ وى ناكه‌ن: { كَلَّا سَيَكْفُرُونَ بِعِبَادَتِهِمْ وَيَكُونُونَ عَلَيْهِمْ ضِدًّا } [ سُورَةُ مَرْيَمَ : 82 ] 2ـ ئه‌گه‌ر خه‌لكى موباله‌غه‌ د مه‌دحێن وى دا كرن دڤێت ئه‌و ڕاستییا خۆ بۆ وان بێژت ودیار بكه‌ت، دا ئــه‌و زێــده‌ د وى نه‌گه‌هن، جاره‌كێ زه‌لامه‌ك ژ هه‌یبه‌تا پێغه‌مبه‌رى دا ـ سلاڤ لێ بن ـ ڤه‌له‌رزى، ئینا پێغه‌مبه‌رى گـۆتــێ: [ هێدى هێدى، هه‌ما ئه‌ز كوڕێ ژنه‌كێ بووم گۆشتێ هشككرى ل مه‌كه‌هێ دخوار ]، وجاره‌كێ هنده‌ك كه‌سان مه‌دحێن ئه‌بوو به‌كرى ل نك كرن، وى گۆت: (یا ره‌ببى تو من باشتـر لـێ بكه‌ى ژ وێ هزرا ئه‌و ژ من دكه‌ن، ووى تشتى بۆ من ژێ ببه‌ یێ ئه‌و ژ من نه‌زانن).
3 ـ بلا ئه‌و ب خۆ ب ده‌ستێن خۆ كارێ خۆ بكه‌ت، وپێتڤییێن خۆ بقه‌تینت دا مه‌زنییا نه‌فسا خۆ بشكێنت.. ده‌مێ موبایه‌عا ئه‌بوو به‌كرى هاتییه‌ كرن، ئه‌و چوو باره‌كێ داران بۆ پیره‌ژنه‌كا فه‌قیر دا پشتا وخۆ ئینا، گۆت: دا نه‌فسا من زێده‌ د خۆ نه‌گه‌هت.
4ـ هندى ئه‌و بشێت دڤێت خۆ ژ مه‌ناصبان بده‌ته‌ پاش، ووان كاران نه‌كه‌ت یێن مه‌زنى تێدا هه‌بت، وه‌كى كو ل ده‌مێ ڕێڤه‌چوونێ ب پێش هه‌ڤالێن خۆ بكه‌ڤت، یان ژ خه‌لكى بخوازت بۆ وى ڕابنه‌ڤه‌، یان خۆ بۆ وى بچه‌مینن، یان ده‌ستێ وى ماچى كه‌ن، پێغه‌مبه‌رى ئه‌ڤ چه‌ندا هه‌ هه‌مى نه‌دكر.

 

ژپه‌رتوكا “مرن وژینا به‌رزه‌خێ” یا م/تحسن دوسكى

Check Also

ڤیدیۆ : ته‌كبیراتێن رۆژێن جه‌ژنا قوربانییا پیرۆز .

ڤیدیۆ : ته‌كبیراتێن رۆژێن جه‌ژنا قوربانییا پیرۆز .   مالپه‌رێ خابیر / زاخۆ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *