مالپه‌رێ خابير مالپه‌ره‌كێ سه‌ربه‌خو یێ هه‌مه‌ره‌نگه
Related Articles
ردوان گولی
قورئانا پیروز بوهارا دلانە و مێرگا پیاو چاكانە، و روناهیا چاڤان و تاجا سەرێ خودان باوەرانە، پەیاما یەزدانێ دلوڤانە و خەلاتەكێ پری بایەخ و گرانە، و ئەڤ پەیامە هاتیە ئاراستەكرن بو كاریگەرترین كەس ل سەر گویا زەمین، ئەو ژی پێغەمبەرێ نازدارە سلاڤێت خودێ ل سەر بن و دویڤچوویێن وی، و ئەڤ پەرتووكا پیروز خواندنا هەر پیتەكێ ب(10) خێرانە، هەر وەكی ل سەر زارێ خوشتڤی سلاڤ لێ بن هاتیە دیاركرن و گوتی: من قرأ حرفا من كتاب الله فله به حسنة والحسنة بعشر أمثالها. الترمذي.
یا خویایە كو مروڤ پێكهاتیە ژ دوو كەرستان(گیان و مادە) ئەڤ هەردووك كەرستە پێدڤی خوارنێ و ڤەخوارنێنە، پارچا مادی ژ لەشێ مروڤی ب ئاڤێ و نانی و بایی و خوشیێت دونیایێ تێر دبیت، بەلێ پارچا گیانی ب خوارنەكا تایبەت و پاقژ تێر دبیت، كو هیچ گومان تێدا نینە ل دەڤ كەسێن خودان باوەر و دویڤچوویێن پێغەمبەرێ خوشتڤی سلاڤێت خودێ ل سەر بن، كو قورئانا پیروزە و زكرێ خودایێ مەزن و دلوڤانە، براستی ژیان دگەل قورئانێ هەر وەكی تورەڤان و هزرڤان شەهید سەید قوتب(1906 — 1966) خودانێ شروڤەكرنا(في ظلال القران) دبێژیت: ژیان دگەل قورئانا پیروز نیعمەتەكە كەس نزانیت بتنێ ئەو نەبیت یێ دگەل ژیابیت. و هەروەسا زانا و هزرڤانێ ناڤدار موحەمەد ئیقبال (1877 — 1938) دبێژیتە كورێ خوە: تو وەسا قورئانێ بخوینە هەر وەكی بو تە هاتیە خوارێ و دگەل تە د ئاخفت. و هوزانڤان و تورەڤانێ ئەلمانی یوهان فولفجانج گوتە (1749 — 1832) دبێژیت: هەردەمێ ئەز قورئانێ دخوینم، ئەز هەست دكەم گیانێ من یێ دلڤلڤیت دناڤ لەشێ مندا، و قورئان پەرتووكا پەرتووكانە، و ئەز ڤێ هزرێ دكەم هەر وەكی هەر مسلمانەك هزر دكەت. و نڤیسكارێ ئەمریكی مایكل هارت (1932 —- 2006) خودانێ پەرتووكا (الخالدون مائة أعظمهم محمد صلى الله عليه وسلم)دبێژیت: نینە ددیرووكێدا پەرتووكەك مابیت ب هەمی پیتێن خوەڤە، بێ كو هیچ گورانكاریەك ل سەر هاتبت كرن ژ بلی قورئانێ، ئەوا موحەمەدی سلاڤێت خودێ ل سەر بن ڤەگوهاستی وەكی یا خویایە ل دەڤ خودان باوەران، كو هیچ گومان تێدا نینە یا ژ دەڤ خودێ هاتی بو پێغەمبەری سلاڤێت خودێ ل سەر بن و قورئان د شەڤا پیروزدا(لیلة القدر) ل هەیڤا رەمەزانێ ژ لەوح ئەلمەحفوز هاتیە رەوانەكرن بو ئەسمانێ دونیایێ و پاشی بو ماوێ (23) سالان ل دویڤ پێداویستیا مروڤان هاتیە خوارێ بو پێغەمبەرێ دوماهیكا زەمانی بابێ قاسمی. ئەو پەرتووك و ناما پیروز یا هیچ جارەكێ حنێر و عەجێبیێت وێ بدوماهیك ناهێن ل دونیایێ، چەكێ مروڤێ مسلمان و خودێ پەرستە، هەر ژبەر هندێ دوژمنێت مسلمانان دبێژن: هندی قورئان دناڤ جڤاكێ مسلمانان مابیت ئەم نەشێن كونترولێ ل سەر وان بكەین، چونكە قورئان ئەو گیانە و هێزا وان پال ددەت و خوەرست دكەت، هەمبەری نەخوشی و گرفت و ئاریشێن ژیانێ.
