مالپه‌رێ خابير مالپه‌ره‌كێ سه‌ربه‌خو یێ هه‌مه‌ره‌نگه
Related Articles
مێهڤان حسین
وەكی ئەڤرۆ 17ی ڕەمەزانێ سالا 2ێ مشەختی غەزایا بەدرا مەزن شەڕێ ئێكلاكەرێ موسلمانان دگەل قورەیشیێن مەككەهێ هاتە ڕوویدان
سەركەفتنا شەڕێ بەدرێ ب سەركردایەتییا پێغەمبەری بوو ( سلاڤێن خودای لێبن)
شەڕێ بەدرا مەزن ب ئێكەم ڕوویبری بوونا سەربازی یا دژوار دهێتە هژمارتن د مێژوویا ئیسلامێ دا، ب ئێك ژ مەزنترین نیشانێن ئێكلاكەر د هێتە هژمارتن د بانگەوازیا ئیسلامی دا، د قورئانا پیرۆز ژی دا ب ڕۆژا فورقان ناڤێ ڤی شەڕی هاتییە، خودایێ مەزن دبێژت: ] وَمَا أَنزَلْنَا عَلَىٰ عَبْدِنَا يَوْمَ الْفُرْقَانِ يَوْمَ الْتَقَى الْجَمْعَانِ [الانفال 41
ڕوویدانێن شەڕێ بەدرێ كێمتر ژ دوو سالان پشتی مشەختبوونا پێغەمبەری (سلاڤێن خودای لێبن) دگەل هەڤالێن وی بۆ باژێرێ مەدینێ هاتن ڕوویدان، ژبەر زولم و زورداریا سەركرداتییا قوریشیێن مەككەهێ مشەخت ببوون بۆ وی باژێری،پشتی مشەخت بوونێ ژی قورەیشی نە ڕاوەستان ژ دەست ب سەرداگرتنا مال و مولكێ موسلمانێن مشەخت بووی.
بەری ڕوویدانێن شەڕێ بەدرێ دەنگ و باس گەهشتن موسلمانان كاروانەكێ بازرگانی یێ مەزن یێ قورەیشییان ژ شامێ بەرەف مە مەككەهی دهێت ب سەركردایەتییا ئەبو سفیانێ كوڕێ حەربی، كو ئێك بوو ژ مەزنێن قورەیشییان د وی دەمی دا،پێغەمبەری (سلاڤێن خودای لێبن) فەرمانا دەركەفتنێ دگەل هەڤالێن خوە دا بۆ ڕێگرتنێ ل وی كاروانی د هەمان دەمدا داكو فشارێ بێخن سەر قورەیشییان.
ئەبو سفیان ئاگەهداری ڤێ دەركەفتنا موسلمانان بوو، لەوما سەركەفتی بوو د ڕەڤین و ڕزگاركرنا كاروانی دا، ژلایەكێ دیڤە هندەك خەلكێ و مەزنێن مەككەهێ بەرهەڤییەكا باش كرن بەرەف كاروانێ خوە هاتن داكو بپارێزن، پشتی كاروان ڕزگار بووی ڤیان ب زڤرن مەككەهێ لێ ئەبو جەهلی( عومەرێ كورێ هیشامێ) شیا سەركردێن قورەیشییان ڕازی بكت داكو هێرشێ بكنە سەر موسلمانان، هیز و هەیبەتا قورەیشان بۆ وان دیار بكت.
هێزان موسلمانان د وی دەمی دا ب دروستی خوە بەرهەڤ نەكربوون بۆ شەڕەكێ سەربازی یێ ژ وی جوری، ژبەركو مەرەما وان ب تنێ ڕێگرتن بوو ل كاروانێ بازرگانی یێ قورەیشییان،بەلێ ل دووماهییێ ب سەركردایەتییا پێغەمبەری (سلاڤێن خودای لێبن) بریارا بەرهنگاربوونا شەڕی دان.
پلانا موسلمانان ئەوبوو بگەهن ئاقارێ بەردێ بەری سوپایێ قورەیشییان ژبەركو بیرێن ئاڤێ ل ۆێ دەڤەرێ هەبوون، موسلمانان شیان بگەهن بیرێن ئاڤێ بەری دوژمنێن خوە، موسلمان سەركەفتی بوون د كونترۆلكرنا بیرێن بەدرێ دا ڕێگێری ل قورەیشییان هاتە كرن بگەهن بیرێن ئاڤێ.
پشتی هەر دوولا گەهشتین جهێ دەستنیشانكری ئێكەم شەڕی مەزن یێ ئیسلامی دەستپێكر، موسلمانان سەركەفتنەكا مەزن تۆماركر شەڕ ب شكەستن و ڕەڤینا قورەیشێن بێ باوەر ب دووماهی هات،تێدا 14 موسلمان شەهیدبوون و 70 كەسێن بێ باوەر ژ قورەیشییان هاتنە كوشتن دناڤ وان دا مەزن و گرگرێن قورەیشییان هەبوون ژوان ئەبو جەهل و ئومەییە كوڕی خەلەفی، هەروسا 70 كەس ژی ژ بی باوەران هاتن ئێخسیركرن.
سەركەفتنا موسلمانان ل شەرێ بەدرێ بوو ئەگەری شكەستنا بها و سەنگا قوریشییان دناڤ عەرەبان دا و كوشتنا مەزنترین سەركردەیێن وان و ڤەگەراندنا پشكەكا مالێ موسلمانان،هەروسا ئەڤ شەڕە بی پالپشتەكێ مەزن بۆ سەركەفتنا موسلمانان د وی دەمی دا بەلێ گرنگترین دەستكەفت ڤەگەرانا بها و ڕێزا موسلمانان بوو و هەروسا گهورینا وان بۆ هێزەكا سەربازی كو دوژمنێن وان ژی بترسن پشتی چەندین سالێن ئەشكەنجەو مشەخت بوونێ.هەروسا بەلگەیەكێ ئاشكرا ل سەر ڕاستییا پەیاما پەیاما پێغەمبەری ( سلاڤێن خودای لێبن) بوو. ئێك ژ گرنگترین موعجیزەیێن شەڕێ بەدرێ كێمیا هژمارا لەشكەرێ موسلمانان بوو، هژمارا وان (317) كەس بوون، دبەرامبەردا هژمار لەشكەرێ قورەیشیان (1000) كەس بوون، خودایێ مەزن موسلمان ب وێ هژمارا كێم ب سەر دوژمنێن وان ئێخستن هەروەكی دبێژت:] وَلَقَدْ نَصَرَكُمُ اللَّهُ بِبَدْرٍ وَأَنتُمْ أَذِلَّةٌ… [ال عمران 123.
