مالپه‌رێ خابير مالپه‌ره‌كێ سه‌ربه‌خو یێ هه‌مه‌ره‌نگه
Related Articles
ردوان گولی
ئەڤرو دناڤ جڤاكێن ساخلەم و هشیاردا، هەر تەخەك ب ئەرك و رولێ خوە یێ سەرەكی رادبیت، و بڤێ ئێكێ هاوكێشە تەمام دبیت، و رێڤەبرنا روژانە یا هاوەلاتیان ئاسنتر دبیت، و شەمەندەفرا ژیانێ دكەفت سەر رێكا راست و دروست، ئانكو كارێ نوژاری چارەسەركرنا نەخوشانە، ئەركێ ماموستای فێركرنا نفشێ نوییە و بەربابێن پاشەروژێ، و كارێ جوتیاری چاندن و گرنگیدان ب بەرهەمێن ناڤخویی ب هەمی جورانڤە، و رولێ پارێزەری بەرەڤانیكرن و پشتەڤانیكرنا ستەمبار و مافخواریانە، و وئەركێ سەرەكی یێ هێزێن لەشكەری و سەربازی پاراستنا توخیب و سنورێن وەلاتینە ژ هەر هێرشەكێ یان دەستدرێژیەكێ، بەلێ هەردەمێ سەربازان مایتێكرن د كاروبارێن سیاسیدا كر، ئەو دێ بیت كارەسات و نهامەتی بو وەلاتی و هاوەلاتیان.
دەمێ سولتانێ عوسمانی سلێمان قانونی ڤیای كەلهەكا خوە خرابكەت و جارەكا دیتر ئاڤاكەت، هوستا سینانێ ئەرمەنی راسپارد بڤی كاری، و روژانە سولتانی سەرەدانا وان دكر، سینانی ئەو كرێكارێن بو روخاندنا دیوارێن كەڤنار بكاردهینان، هەمان كرێكار بو ئاڤاكرنا دیوارێن نوی بكارنەهینان ؟! دەمێ سولتانی پرسیار ژێ كری، ئەرێ بوچی تە ئەڤ چەندە كر ؟! سینانی گوت: گەورەم هەر هندەك مروڤ بكێر شولەكێ دهێن، هندەك بو خرابكرنێ زیرەكن و ئازانە، بەلێ هەمان مروڤ بو ئاڤاكرنێ زیرەك نینن، ئانكو هەر ئێكێ كارێ خوە یێ تایبەت هەیە.
هندی من دویڤچوون كری، ل سەرانسەری جیهانێ ئەو وەلاتێن كەتین ژێر زالگەها لەشكەری و كودەتایێن وان، بتنێ (هەژاری و گەندەلی و دزی و سەرپێچیا یاسای و دەردەسەری و مشەختبوون و بێ كاری و پاشكەفتن و كێمكرنا ئازادیا دەربرینێ و ئابوریەكێ لاواز و ئاڤاكرنا گرتیخانێن نوی بو خەلكی وووو) و ئەگەر تەماشەی دوو وەلاتان بكەین وەكی نموونە مسر و توركیا، و ئەگەر پرسیار بكەین كیژك ژ ڤان پێشكەفتیترە ؟! ئانكوت وەلات یێ وەكی گرتیخانەكا مەزن لێ كری، ئەوێ بشێت ژێ برەڤت، ئەوی خوە ژ دوزەخا دونیایێ قورتال كر، چونكە ئەو یێ ل سەر سیستەمێ سەربازی فێربووین(نفذ پم ناقش) ئانكو جێبەجێ بكە و پاشی دانوستاندنێ بكە ! . زوربەیا ئەوێن حكومرانی ل مسرێ كرین، خودان عەقلیەتا سەربازی و لەشكەری بوون، و توركیا بەروڤاژی ئەوێن حكومرانی كرین خودان ژیرەكێ مەدەنی و سڤیل بوون، ئەز بێژم جیاوازیەكا ئێكجار مەزن و بەرچاڤ هەیە، ئەگەر ب شێوەكێ زانستی و مەنتقی نێرینێ لێ بكەین، دویر ژ عاتیفێ و كەربێ و خوش خوشكان، دەمێ لەشكەر دەستهەلاتێ دگرن و كونترول دكەن، هەر وەكی مروڤ گوهدرێژی ببت بو كێبەركێ و هەسپی ببت بو جوتكرنێ !
دەمێ ئاندیرا گاندی پرسیار ژ بابێ خوە جەواهر لال نەهرو كری، ئەرێ دێ چ دروست بیت ئەگەر لەشكەر حكومرانیێ بكەن ؟! بابێ وێ بەرسڤدا و گوت: دێ دزیكرن بەلاڤە بیت و ئابور دێ هەرفیت، جارەكا دیتر پرسیار ژ بابێ خوە كر، ئەرێ دێ چ روی ددەت پشتی ئابور ژناڤ بچیت ؟! بابێ وێ گوت: رەوشتێ خێزانان دێ ژناڤ چیت و پاشی یێ جڤاكی، و جارەكا دیتر پرسیار ژێ كر، ئەرێ دێ چ روی ددەت ئەگەر رەوشت نەما و ژناڤ چوو ؟! بابێ وێ بەرسڤەكا پری زانین و حیكمەت دا و گوت: ئەو چ تشتە دێ تەهێلت ل وەلاتەكێ رەوشتێ وان ژناڤ چوو بیت !!.
